ކުރިއަށްއޮތް ރިޔާސީ އިންތިހާބުގައި އެމްޑީޕީގެ ޓިކެޓް ހޯދުމަށް އެ ޕާޓީގެ އެތެރޭގައި ބާއްވާ ރިޔާސީ ޕްރައިމަރީގައި ކުރީގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ވާދަ ކުރައްވާނެކަން ރަސްމީކޮށް އިއުލާނު ކުރައްވައިފިއެވެ.
ރައީސް ނަޝީދު އެމްޑީޕީގެ ޕްރައިމަރީގައި ވާދަ ކުރައްވާނެކަން މީގެ ކުރިން ރަސްމީކޮށް އިއުލާނު ކުރައްވާފައެއް ނުވެއެވެ. ނަމަވެސް އެމަނިކުފާނަށް ތާއީދު ކުރައްވާ ޕާޓީގެ ބައެއް އިސް ބޭފުޅުންނާއިއެކު ވަކިން ވަޓްސްއެޕް ގުރޫޕެއް ހައްދަވައިގެން ކެމްޕޭނުގެ މަސައްކަތް ކުރައްވަމުން ގެންދެވިކަން ވަނީ ހާމަވެފައެވެ.
ޕްރައިމަރީގައި ރައީސް އިބްރާހީމް މުޙައްމަދު ޞާލިޙާއި ވާދަ ކުރައްވާނެކަން ރައީސް ނަޝީދު އިއުލާނު ކުރައްވާފައިވަނީ އެމަނިކުފާނު ކުރެއްވި ޓްވީޓެއްގައެވެ.
ރައީސް ނަޝީދުގެ ޓްވީޓްގައި ވިދާޅުވީ، އެމްޑީޕީގެ ރިޔާސީ ޕްރައިމަރީގައި ވާދަކުރައްވަން ނިންމަވާފައިވާ ކަމަށާއި ޕާޓީގެ ހުރިހާ މެންބަރުންގެ ވޯޓު އެމަނިކުފާނަށް ދިނުމަށް އެދިވަޑައިގަންނަވާ ކަމަށެވެ.
ރައީސް ނަޝީދު ޕްރައިމަރީގައި ވާދަކުރައްވާނެކަން ރަސްމީކޮށް އިއުލާނު ކުރައްވާފައިވާއިރު މީގެ ކުރިން ރައީސް ޞާލިޙް ވެސް ވަނީ ޕްރައިމަރީގައި ވާދަ ކުރައްވާނެކަން ހާމަ ކުރައްވާފައެވެ. ނަމަވެސް ރައީސް ޞާލިހުވެސް އަދި ރަސްމީކޮށް ޕްރައިމަރީގެ ކެމްޕޭން ފައްޓަވާފައެއް ނުވެއެވެ.
އެމްޑީޕީން މިހާރުވަނީ ޕްރައިމަރީގައި ވާދަކުރުމުގެ ފުރުސަތު އާންމުކޮށް ހުޅުވާލާފައެވެ. ޕްރައިމަރީ އޮންނާނީ އަންނަ މަހުގެ 28 ގައެވެ.
ކޮމެންޓްސް (0)