މިމަހުގެ 29 ވަނަ ދުވަހު އައްޑޫސިޓީ ހިތަދޫގައި ފަށާ އައްޑޫ ފުޓުބޯޅަ ޗެމްޕިއަންޝިޕް ފުޓްބޯޅަ މުބާރާތުގައި ހިތަދުން ބައިވެރިވާ މައިލޯ ސިޓީއަށް ރާއްޖޭގެ މަޝްހޫރު ފުޓްބޯޅަ ކުޅުންތެރިޔާ އަލީ އަޝްފާގު ކުޅޭނެކަމަށް އެޓީމުން ބުނެފިއެވެ.
މިމުބާރާތުގެ ގަވާއިދު ހަމަޖެހިފައިވާގޮތުން މުބާރާތުގައި ބައިވެރިވާ ޓީމްތަކުގައި ކުޅެވޭނީ އެރަށަކަށް ނިސްބަތްވާ ކުޅުންތެރިން ހިމަނައިގެންނެވެ. އެނޫން ގޮތަކަށް ޓީމެއްގައި ކުޅުންތެރިއަކު ބައިވެރިކުރެވެން އޮތީ އެރަށެއްގެ މީހަކާއި އިނދެގެން އުޅޭނަމައެވެ. މައުލޫމާތު ލިބިފައިވާގޮތުގައި އަޝްފާގު މައިލޯ ސިޓީ ޓީމްގައި ހިމެނޭގޮތައް ހަމަޖެހުނީ އަޝްފާގު އަކީ އޭނާގެ ބައްޕަ ފަރާތުން ހިތަދޫ އަށް ނިސްބަތްވާ މީހަކަށް ވުމުންނެވެ.
މީގެ ކުރިން އަޝްފާގް އައްޑޫސިޓީގައި ބޭއްވުނު އެއްވެސް މުބާރާތެއްގައި ކުޅެފައި ނުވެއެވެ. އައްޑޫ ފުޓުބޯޅަ ޗެމްޕިއަންޝިޕް އަކީ އައްޑޫ ސިޓީ ކައުންސިލުން އިސްނަންގަވައިގެން އައްޑޫގެ ކްލަބްތަކަށް ހުޅުވާލެވިގެން ބޭއްވޭ މުބާރާތެކެވެ. މިއީ މުބާރާތް ބާއްވާ 3 ވަނަ ފަހަރެވެ. މިފަހަރުގެ މުބާރާތުގައ 7 ޓީމަކުން ވަނީ ބައިވެރިވެއެވެ.