މިމަހުގެ 19 ވަނަ ދުވަހުގެރޭ ބާއްވަން ހަމަޖެހިފައިވާ ފިލްމު އެވޯޑްސްގެ އެންމެ މޮޅު ބަތަލާގެ ބަޔަށް ‘4426’ އިން މަރިޔަމް އައްޒަ ނޮމިނޭޓް ނުވުމުން ހައިރާންކަން ލިބުނު ޕްރޮޑިއުސަރު އަދި ޑައިރެކްޓަރ ފާތުމަތު ނަހުލާ އަނެއްކާވެސް އައްޒައަށް ފިލުމެއް ހުށަހަޅައިފި އެވެ.
ނަހުލާ ދެން އުފައްދާނީ ކޮން ފިލުމެއް ކަން ނުބުނި ނަމަވެސް އޭނާގެ ފޭސްބުކު ޕޭޖުގައި ބުނެފައިވަނީ ކްރިސްޓަލް އެންޓަޓެއިންމެންޓުން ދެން އުފައްދާ ފިލުމެއްގައިވެސް ލީޑް ރޯލް އަދާ ކުރުމަށް އައްޒައަށް ހުށަހަޅާ ކަަމަށެވެ. އައްޒަ ވަނީ ފޭސްބުކު މެދުވެރިކޮށް ނަހުލާގެ ހުށަހެޅުން އުފަލާއެކު ބަލައިގަތް ކަމަށް ބުނެފަ އެވެ.
މީގެ ކުރިން ވީނިއުސްއަށް ނަހުލާ ދިން އިންޓަވިއުއެއްގައި ބުނެފައިވަނީ ‘ބޮސް’ އަށްފަހު ދިގު ބްރޭކެއް ނަގަން ބޭނުންވާ ކަމަށެވެ. ދެން ފިލުމެއް އުފައްދާނެ ތާރީހެއް ނުވަތަ އެފަދަ ހިޔާލެއްވެސް ހުރިކަމެއް އޭރު ނަހުލާ ހާމަކޮށްފައެއް ނުވެ އެވެ. ނަމަވެސް ނަހުލާގެ ކުންފުނި ކްރިސްޓަލް އިން އަނެއްކާވެސް ބެލުންތެރިންގެ މަގުބޫލުކަން ހޯދާވަރުގެ ފިލުމެއްގެ މަސައްކަތް އަންނަ އަހަރު ފަށާނެ ކަަމުގެ އިޝާރާތެއް ނަހުލާ މިހާރު މިވަނީ ދީފަ އެވެ.
އޮލިމްޕަހުގައި މިއަހަރު އެޅުވި ގިނަ ފިލުމުތަކެއްގައި ލީޑް ރޯލް އަދާކުރި އައްޒަ އަކީ މިހާރު ފިލުމީ ދާއިރާގައި މަޝްހޫރު މޫނެކެވެ. އޭނާއަށް ބެލުންތެރިންގެ ލޯތްބަކީ އެވޯޑަކަށްވުރެ މާ މުހިއްމު އެއްޗެއް ކަމަށްވެސް އައްޒަ ގެންދަނީ ބުނަމުންނެވެ. ފިލުމު އެވޯޑްސްގައި އެންމެ މޮޅު ބަތަލާގެ އެވޯޑަށް އައްޒަ ނޮމިނޭޓް ނުވުމުން ސޯޝަލް މީޑިއާގައި އައްޒަގެ ފޭނުން ވަނީ ބޮޑު ކެމްޕޭނެއްވެސް ފަށާފަ އެވެ.
އައްޒަ ބުނީ ނޮމިނޭޝަންސްތައް އައި ގޮތުން އެއްވެސް ވަރަށް ހިތްވަރު ގެއްލިގެން ނުދާ ކަމަށާއި، އޭނާގެ ފޭނުންގެ ލޯތްބާއި ތާއީދުގެ ސަބަބުން ކުރިއަށް އޮތް އަހަރު އަދި މާ މޮޅު އެކްޓިން އެއް ދެއްކުމަށް މަސައްކަތް ކުރުމުގެ ހިތްވަރު އާވެއްޖެ ކަމަށެވެ.