އައްޑޫގެ ސްކޫލްތައް ބަންދުކޮށްފި

އައްޑޫ ސިޓީގެ ސްކޫލްތައް ދެހަފްތާގެ މުއްދަތައް ބަންދުކުރަން ނިންމައިފިއެވެ.

ކޮވިޑް 19 އާއި ގުޅިގެން އައްޑޫ އިމަޖެންސީ އޮޕްރޭޝަން ސެންޓަރުގައި ރޭ ބޭއްވު ނޫސްވެރީންގެ ބައްދަލުވުމުގައި ވާހަކަފުޅު ދައްކަވަމުން އައްޑޫ ސިޓީގެ މޭޔަރު އަލީ ނިޒާރު ވިދާޅުވީ އައްޑޫގެ ސްކޫލްތައް ދެހަފްތާގެ މުއްދަތައް ބަންދުކުރަން ނިންމިކަމުގައިވިޔަސް ހާލަތު ބަދަލުވެއްޖެނަމަ އެއަށް ވުރެ އަވަހަށް ސްކޫލްތައް ހުޅުވާނެ ކަމަށް ނިޒާރު ވިދާޅުވިއެވެ.

ސްކޫލްތައް ބަންދުކުރުމުގެ އިތުރުން ރޭގަނޑު 9 އިން ފެށިގެން ފަތިހު ހަތަރަކަށް ކާފިއު ހިންގުމަށް ވެސް ވަނީ ނިންމާފައެވެ.

މި ފިޔަވަޅުތައް އަޅާފައިމިވަނީ ކޮވިޑް-19 ގެ ކޭސްތައް ގިނަ އަދަދަކަށް ފެނުމާ ގުޅިގެން އައްޑޫގެ ގުޅިފައިވާ ރަށްތައް މޮނީޓަރިން ހާލަތަށް ގެނައުމާ ގުޅިގެންނެވެ. އެގޮތުން އިއްޔެވެސް އައްޑޫ އިން ވަނީ އިތުރު 18 މީހަކު ކޮވިޑަށް ޕޮޒިޓިވް ވެފައެވެ.

އޭގެތެރޭގައި ހިމެނެނީ 12 ޑައިރެކްޓް ކޮންޓެކްޓުންނާއި، ފަސް ފްލޫ ސާމްޕަލް އާއި އެއް ރެންޑަމް ސާމްޕަލް އެވެ.