އައްޑޫ އިމަޖެންސީ އޮޕަރޭޝަން ސެންޓަރުން ކޮވިޑް-19 އާއި ގުޅިގެން އައްޑޫ ސިޓީގައި އިއުލާންކޮށްފައިވާ ކާފިއުގެ މުއްދަތު މިމަހުގެ ދެވަނަ ދުވަހުން ފެށިގެން އެއްހަފުތާގެ މުއްދަތައް އިތުރުކުރި ކުރުން އިއްޔެ ( 9 ޖޫން 2021 ) ގެ ނިޔަލަށް މިވަނީ ހަމަވެގެންގޮސްފައެވެ. އެހެންނަމަވެސް ކާފިއު ހިންގުމަށް އެންގި މުއްދަތު ހަމަވެގެންދިޔައިރު އެ މުއްދަތު އިތުރު ދުވަސްތަކަކަށް ދަމަހައްޓަން އައްޑޫ އިމަޖެންސީ އޮޕަރޭޝަން ސެންޓަރު އަންގާފައިނުވާތީ އައްޑޫގައި އިއުލާންކޮށްފައިވާ ކާފިއުގެ މުއްދަތު މިހާރު މިވަނީ ހަމަވެގެންގޮސްފައެވެ.
އަދި މީގެ އިތުރަށް އިސްލާމިކު މިނިސްޓްރީންވެސް މިދިޔަ މެއިމަހުގެ 13 ވަނަ ދުވަހުގެ ފަތިސް ނަމާދުން ފެށިގެން 9 ޖޫން 2021 ވަނަ ދުވަހުގެ ފަތިސްނަމާދުގެ ނިޔަލަށް އައްޑޫގެ ހުރިހާ މިސްކިތެއްގައި ޖަމާއަތުގައި ނަމާދު ނުކުރުމަށް އެންގި އެންގުމުގެ މުއްދަތުވެސް އިއްޔެގެ ނިޔަލަށް މިވަނީ ހަމަވެފައެވެ.
އައްޑޫގައި ކާފިއު ހިންގަމުން ގޮސްފައިވަނީ ހަވީރު ހަތަރަކުން ފެށިގެން ފަތިހު 4:00 އަށެވެ. އެ ވަގުތުތަކުގައި އެއްގަމު އުޅަނދުފަހަރު ދުއްވުމާއި، މަގުމައްޗާއި އާންމު ތަންތަނަށް މީހުން ނިކުތުން ވަނީ މަނާކޮށްފައެވެ.
އަދި އައްޑޫގައި އެއް އަވަށުން އަނެއް އަވަށަށް އަދި އެއް ގެއިން އަނެއް ގެއަށް ޒިޔާރަތް ކުރުން ހުއްޓާލުމަށާއި، ޕާޓީތަކާއި، ޙަފްލާތަކާއި، ރަސްމިއްޔާތުތައް ބޭއްވުން ހުއްޓާލުމަށާއި، އެއްފަހަރާ ތިން މީހުންނަށްވުރެ ގިނަމީހުން މަގުމައްޗާއި އާންމު ތަންތަނުގައި އެއްވެއުޅުން ކާފިއުގެ ދަށުން ހުއްޓާލުމަށް ވެސް އެންގިއެވެ.
ކޮމެންޓްސް (0)