ޔޫރޯ އަންޑަރ ޓުވެންޓީވަން ފުޓްބޯޅަ މުބާރާތުގެ ޗެމްޕިއަންކަން ޖަރުމަނުޓީމް ހޯދައިފިއެވެ.
ޖަރުމަނުޓީމުން މިމުބާރާތުގެ ޗެމްޕިއަންކަން ހޯދީ ރޭ ކުޅެވުނު ފައިނަލްމެޗްގައި ޕޯޗްގަލްއާއި ބައްދަލުކޮށް 1 ލަނޑު 0 ލަނޑުން މޮޅުވެގެންނެވެ.
ސްލޮވޭނިޔާގައި ރޭ ކުޅެވުނު މިމެޗްގެ ފުރަތަމަ ހާފްގައި ދެޓީމުގެ ފަރާތުންވެސް ފެނިގެންގޮސްފައިވަނީ ދާދިހަމަހަމަ ވާދަވެރި ކުޅުމެކެވެ. އެހެންނަމަވެސް ދެވަނަ ހާފް ފެށިގެން ހަތަރުވަނަ މިނެޓު ގައި ޖަރުމަނުން ވަނީ އެޓީމުން މިމެޗްގައި ކާމިޔާބުކުރި ހަމައެކަނި ލަނޑު ކާމިޔާބުކޮށް މެޗްގެ ލީޑު ހޯދާފައެވެ. މި ލަނޑު ކާމިޔާބުކޮށްދިނީ ލޫކަސް ނިމެޗާއެވެ. މިލަނޑަކީ އެޓީމުގެ ރިޑެލް ބަކޫގެ ތަނަވަސްކޮށްދިން ފުރުސަތަކުން ނިމެޗާ ކާމިޔާބުކޮށްދީފައިވާ ލަނޑެކެވެ.
ޖަރުމަނުޓީމުން ލަނޑެއް ކާމިޔާބުކޮށް މެޗްގެ ލީޑު ހޯދުމުން ޕޯޗުގަލް ޓީމުގެ ކުޅުންތެރީންވެސް އިތުރަށް ކުޅުން ރަގަޅުކޮށް މެޗްގެ ނަތީޖާ ހަމަހަމަ ކުރަން ވަރަށް ބޮޑަށް މަސައްކަތްކޮށްފައިވެއެވެ. އެހެންނަމަވެސް މެޗްގެ ފުރިހަމަ ވަގުތު ހަމަވެގެންދިޔައީ 1 ލަނޑު 0 ލަނޑުން ޖަރުމަން މެޗް ކާމިޔާބުކޮށް މުބާރާތުގެ ޗެމްޕިއަންކަން ހޯދައިގެންނެވެ.
މިމުބާރާތުގެ މޮޅު ކުޅުންތެރިޔަކަށް ހޮވުނީ ޕޯޗުގަލްގެ ފަބިއޯ ވިއެރާއެވެ. މިމުބާރާތުގައި 4 ލަނޑު ޖަހައިގެން އެންމެ ގިނަ ލަނޑު ޖެހި ކުޅުންތެރިއަކަށް ހޮވިފައިވަނީ ރޭގެ މެޗްގައި ޖަރުމަންޓީމަށް ލަނޑު ކާމިޔާބުކޮށްދީ ޗެމްޕިއަންކަން ހޯދައިދިން ނިމެޗާއެވެ.
މިއީ ޖަރުމަނުވިލާތުގެ ޓީމް މިމުބާރާތުގެ ފައިނަލްގައި ޖެހިޖެހިގެން ދާވަކުރާ ތިންވަނަ ފަހަރެވެ. މީގެ ތެރެއިން 2017 ވަނަ އަހަރުގެ މުބާރާތުގެ ޗެމްޕިއަންކަން ޖަރުމަންޓީމް ހޯދިކަމުގައިވިޔަސް 2019 ވަނައަހަރުގެ ފައިނަލްގައި ޖަރުމަންވަނީ ސްޕެއިން އަތުން ބަލިވެފައެވެ
ޕޯޗުގަލްއަށް ބަލާއިރު މިއީ ޔުއެފާ އެކާވިސް އަހަރުން ދަށުގެ ފުޓްބޯޅަ މުބާރާތުގެ ފައިނަލުގައި އެގައުމު ބަލިވި ތިންވަނަ ފަހަރެވެ. މީގެ ކުރިން 1994، 2015 ވަނަ އަހަރުވެސް ފައިނަލުގައި ކުޅެ ޕޯޗުގަލް ވަނީ ބަލިވެފައެވެ.
ތަފްސީލް އަންނަނީ
ކޮމެންޓްސް (0)