ސޭވް އައްޑޫ ކެމްޕޭނުގައި ގިނަ އަދަދެއްގެ އައްޑޫ ރައްޔިތުން ބައިވެރިވަނީ

އައްޑޫގައި އިންޑިޔާ ކޮންސިއުލޭޓެއް ޤާއިމުކުރާތީ އެކަމުގައި ކަންބޮޑުވުން ފާޅުކުރުމުގެ ގޮތުން އައްޑޫ ޒުވާނުންތަކެއް އިސްނަގައިގެން ކުރިއަށްގެންދާ “ސޭވް އައްޑޫ” ކެމްޕޭނުގައި އައްޑޫގެ ގިނަ އަދަދެއްގެ ރައްޔިތުން ބައިވެރިވާން ފަށައިފިއެވެ

ސޭވް އައްޑޫ ހަރަކާތުގެ ޓުވިޓާ އެކައުންޓުގައި ގިނަ ބަޔަކު “ސޭވް އައްޑޫ” ޖަހާފައިވާ ޕޯސްޓަރުތަކާއެކު ނަގާފައިވާ ފޮޓޯތައް ދަނީ ހިއްސާކުރަމުންނެވެ. އޭގެ ތެރޭގައި އައްޑޫގެ އެކި އުމުރުފުރާގެ ގިނަ އަދަދެއްގެ ރައްޔިތުން އަންނަނީ ބައިވެރިވަމުންނެވެ. އައްޑޫގެ ގިނަ ބަޔަކުވަނީ އައްޑޫގައި އިންޑިޔާއިން ކޮންސިއުލޭޓެއް އަޅަން ނިންމާފައިވަނީ އައްޑޫ ރައްޔިތުންގެ ޚިޔާލާއި މަޝްވަރާ ހޯދުމެއް ނެތިކަން ފާހަގަކޮށް ކަންބޮޑުވުން ފާޅުކޮށްފައެވެ.

އައްޑޫގައި އިންޑިޔާގެ ކޮންސިއުލޭޓެއް ޤާއިމުކުރަން އިންޑިޔާގެ ކެބިނެޓުން ނިންމުމާ ގުޅިގެން އެ ނިންމުން ތަންފީޒުކުރުމުގެ ކުރިން އައްޑޫ ރައްޔިތުންގެ މަޝްވަރާއާ ޚިޔާލު ހޯދުމަށް ގޮވައިލާ އައްޑޫގެ ޒުވާނުންތަކެއް އިސްނަގައިގެން ޕެޓިޝަނެއްވެސް އަންނަނީ ތައްޔާރުކުރަމުންނެވެ.އަދި ރޭ 9.00 ގައި އައްޑޫގައި ކޮންސިއުލޭޓެއް ޤާއިމުކުރަން އިންޑިޔާއިން ކުރަމުން އަންނަ މަސައްކަތާ ގުޅޭ ގޮތުން ތަޖުރިބާކާރުންގެ މައްޗަށް އެކުލެވޭ ޕެނަލަކުން ޚާއްޞަ ޕެނަލް ޑިސްކަޝަނެއްވެސް ވަނީ ބާއްވާފައެވެ. މި ޕެނަލުގައި ޕްރޮފެސާ ޙަސަން އުގައިލް، އަދި އެމްއެންޑީއެފް ކުރީގެ ކެޕްޓަން ރިޓަޔާޑް ޑރ.ޢަލީ އިޙުސާންއާއި އައްޑޫގެ ކުރީގެ ޑެޕިއުޓީ މޭޔަރު ހަސަން ޝާހިދުވެސް ބައިވެރިވެވަޑައިގެންފައިވެއެވެ.

މަސްދަރު: ދިޔަރެސް- ފޮޓޯ: ސޭވް އައްޑޫ ޓުވިޓާ