އައްޑޫ ސިޓީ ކައުންސިލްގެ ޑެޕިއުޓީ މޭޔަރަކަށް ހިތަދޫ މެދުވަލު ދާއިރާގެ ކައުންސިލަރު މުހައްމަދު ޝުއާއު ހޮވަން އެމްޑީޕީގެ އައްޑޫ ކައުންސިލަރުން ރޭ ފާސްކޮށްފިއެވެ.
އެމްޑިޕީ ކައުންސިލަރުން މިގޮތަށް ފާސްކޮށްފައިވަނީ ރޭ އެމްޑީޕީ އޮފީހުގައި ބޭއްވުނު ބައްދަލު ވުމެއްގައެވެ. މި ބައްދަލުވުމުގައި ތިން ކައުންސިލަރަކު ވަނީ ޑެޕިއުޓީ މޭޔަރު ކަމަށް ޝައުގުވެރިކަން ފާޅުކޮށްފައެވެ. އެގޮތުން ޝުއާއުގެ އިތުރުން ދެން އެ މަގާމަށް ޝައުގުވެރިކަން ފާޅުކުރީ ހިތަދޫ ކޮރޮވައު ދާއިރާގެ ކައުންސިލަރު އިބްރާހިމް ޝިނާޒު މޫސާގެ އިތުރުން ރަސްގެދަރަ ދާއިރާގެ ކައުންސިލަރު ހުސެއިން ޒަރީރުއެވެ.
ރޭ ބޭއްވުނު މިބައްދަލުވުމުގައި ޝުއާއު އަށް ތިން ވޯޓު ލިބުނުއިރު، ޒަރީރު އާއި ޝިނާޒު އަށް ލިބިފައިވަނީ ދެ ވޯޓެވެ.
އައްޑޫ ކައުންސިލްގެ ހުވާ ކުރުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މިއަދު ހެނދުނު 10:00 ގައި އައްޑޫ ހައި ސްކޫލްގައެވެ.
ކައުންސިލަރުން ހުވާ ކުރުމަށް ފަހު ކައުންސިލްގެ ފުރަތަމަ ޖަލްސާ ވަގުތުން ބާއްވައި އައްޑޫގެ ޑެޕިއުޓީ މޭޔަރަކު ހޮވުމުގެ ކަންކަން ކުރިއަށް ގެންދާނެއެވެ.