ޕާޓީގެ އެތެރެއިން އެމްޑީޕީގެ މެމްބަރުންނަށް ހައްގުވާ މިންވަރު ހޯދައި ދިނުމަށް މަސައްކަތް ކުރާނެކަމަށްބުނެ ފެށޭ މަހު 29 ވަނަ ދުވަހު ބާއްވަން ނިންމާފައިވާ އެމްޑީޕީ ގައުމީ މަޖިލީހުގެ އިންތިހާބުގައި އައްޑޫސިޓީގެ ރައީސްކަމަށް ވާދަކުރައްވަން ނިންމަވައި ވަސީމު ކެމްޕެއިން ކުރައްވަން ފައްޓަވައިފިއެވެ.
މީދޫދާއިރާގެ އެމްޑީޕީގެ ކަންތައްތަކުގައި އަބަދުވެސް އުޅުއްވަމުން ގެންދަވާ ވަސީމު އެމްޑީޕީ ގައުމީ މަޖިލީހުގެ އިންތިހާބުގައި އައްޑޫސިޓީގެ ރައީސްކަމަށް ވާދަކުރައްވަން ނިންމެވުމަށްފަހު ސޯޝަލް މީޑިއާގައި ދަނީ ކެމްޕެއިން ކުރައްވަމުންނެވެ.
މިގޮތުން ވަސީމުގެ ފޭސްބުކް ޕޭޖްގައި ހަމާކޮށްފައިވާގޮތުން ވަސީމު އައްޑޫސިޓީގެ ރައީސްކަމަށް ހޮވިއްޖެނަމަ މުޅި އައްޑޫސިޓީގައި ބަންދުކޮށްފައިހުރި އެމްޑީޕީގެ ހަރުގެތައް އަލުން ހުޅުވާ އެހަރުގެ ތަކަށް އަލިކަން ގެނެސްދީ ޕާޓީގެ ރޫހު މިހާރަށްވުރެ ބޮޑަށް އައްޑޫސިޓީގައި ވަރުގަދަކުރުމަށް މަސައްކަތް ކުރައްވާނެކަމަށް ބުނެފައިވެއެވެ.
” ޕާޓީ ނިޒާމެއްގައި ހިންގަންވާނީ ޕާޓީގެ ވެރިކަން ، ސަރުކާރު ތަންފީޒުކުރަންވާނީ ޕާޓީގެ ސިޔާސަތު ، ޕާޓީގެ ސިޔާސަތު ނަގަހައްޓަންޖެހޭނީ ގައުމީ މަޖިލިހުން ، އެކަން ކުރުމަށްޓަކައި ތިޔަބޭފުޅުންނާއެކީ މަސައްކަތް ކުރުމަށް އަޅުގަޑަށް ފުރުސަތު ދެއްވާ ، އެމްޑީޕީގެ ލޮބުވެތި މެމްބަރުންގެ އަތްމަތީގައި ގޮތްނިންމުން އޮތީ ، ވަސީމުއަށް ވޯޓް އަޅައި ފޮށިތައް ފުރާލަދެއްވާ ” ވަސީމުގެ ފޭސް ބުކް ޕޭޖްގައި ވަސީމު ލިއުއްވާފައިވެއެވެ.
ވަސީމުއަކީ އެމްޑީޕީގައި ފަހަކަށް އައިސް ވަރަށް ގިނަ މަސައްކަތްތަކެއް ކުރައްވަމުން ގެންދަވާ ބޭފުޅެއްކަން ވަނީ ފާހަގަކުރެވިފައެވެ.