އެމްއީސީ ނެޓްބޯޅަ މުބާރާތުގައި ހުޅުދޫ ޔޫތުން ކުޅުނު ހަތަރުވަނަ މެޗުގައި ޓީމް ހުދުހުދު ބަލިކޮށް ގްރޫޕް އޭގެ އެއްވަނަ ޓީމުގެ ގޮތުގައި މުބާރާތުގެ ސެމީ ފައިނަލުން ހުޅުދޫ ޔޫތު ޖާގަ ހޯދައިފިއެވެ.
މީދޫ ކުޅިވަރު އެރީނާގެ ނެޓްބޯޅަ ކޯޓުގައި ރޭ ކުޅުނު ފޯރިގަދަ މިމެޗު ހުޅުދޫ ޔޫތުން ކާމިޔާބުކުރީ 15 ޕޮޓް 8 ޕޮޓުންނެވެ.
ދެޓީމްގެ ފަރާތުންވެސް ވާދަވެރި ކުޅުމެއް ފެނިގެންދިޔަ ރޭގެ މެޗުގެ މޮޅު ކުޅުންތެރިޔަކަށް ހޮވުނީ ހުޅުދޫ ޔޫތުގެ ސަވާ އިބްރާހިމްއެވެ.
މުބާރާތުގައި މިހާތަނަށް ކުޅުނު 4 މެޗުންވެސް މޮޅުވެ ހުޅުދޫ ޔޫތު ސެމީއަށް ދަތުރުކޮށްފައިވާ އިރު، އެޓީމްއަތުން ރޭގެ މެޗުން ބަލިވި ޓީމް ހުދުހުދުވެސް ވަނީ ސެމީފައިނަލަށް ހޮވިފައެވެ. ޓީމް ހުދުހުދު ސެމީފައިނަލަށް ހޮވިފައިވަނީ އެޓީމް ކުޅުނު 4 މެޗުގެ ތެރެއިން 3 މެޗުން މޮޅުވެ އެއްމެޗުން ދެރަވެ 9 ޕޮއިންޓް ލިބިގެން ގްރޫޕް އޭގެ ދެވަނަ ޓީމްގެ ގޮތުގައެވެ.
މީދޫ ޗޭނު ޖަމްއިއްޔާއިން އިސްނަގައިގެ އިންތިޒާމްކޮށްގެން މީދޫގައި ކުރިއަށް ގެންދާ މިނެޓްބޯޅަ މުބާރާތުގައި 9 ޓީމަކުން ބައިވެރިވެއެވެ. ދެ ގްރޫޕަކަށް ބަހާލައިގެން ކުރިއަށް ގެންދިޔަ މިމުބާރާތުގެ ގްރޫޕް ބީން އެއްވަނަ ޓީމެއްގެ ގޮތުގައި ސެމީފައިނަލަށް ހޮވިފައިވަނީ ހުޅުމީދޫ ޕޮލިސްޓީމެވެ. މިގްރޫޕުން 2 ވަނަ ޓީމްގެ ގޮތުގައި ސެމީފައިނަލަށް ހޮވިފައިވަނީ މިފްކޯއެވެ.
މިމުބާރާތުގައި ބައިވެރިވި ޓީމްތަކަށް ރާއްޖޭގެ އެކިސަރަހައްދުތަކުގެ މޮޅު ނެޓްބޯޅަ ކުޅުންތެރީން ކުޅެފައިވާއިރު އެއްޓީމަކަށް އަތޮޅުން ބޭރުގެ އެންމެ ގިނަ ކުޅުންތެރީން ކުޅެމުންދަނީ ޕޮލިސްޓީމަށެވެ. އަދި އެޓީމަށް ކުޅެމުންއަންނަ ރަށުން ބޭރުގެ ކުޅުންތެރީންގެ ފަރާތުން ތަފާތު މޮޅުކުޅުމެއް ފެނިގެންގޮސްފައިވެއެވެ.