ގުސީއާއި ރައްޔުގެ ހެޓްރިކާއެކު މީދޫ ޔޫތު ޗެލެންޖް 2020 ފުޓްބޯޅަ މުބާރާތުގައި ހޮނިހިރު ދުވަހު ކުޅެވުނު މެޗްގައި ވަރުގަދަ ވާނެކަމަށް ބެލެވުނު އެތުލެޓިކް އެފްސީ ކޮޅަށް 12 ލަނޑު ޖަހާ ބޮޑު ތަފާތަކުން އެފްސީ އަމީގޯ މޮޅުވެއްޖެ އެވެ.
ހޮނިހިރު ދުވަހު ކުޅެވުނު މިމެޗްގައި މީދޫގެ މަޝްހޫރު ވޮލީ ކުޅުންތެރިޔާ ޔާސީންގެ ކޯޗް ކަމުގެ ދަށުގައި ކުޅުނު އެތުލެޓިކް އެފްސީގެ ފުލްޓީމުގައި ހިމެނޭ ބައެއް ކުޅުންތެރީން މެޗް ފެށުނިއިރުވެސް ދަނޑަށް ހާޒިރުވެފައިނުވާތީ އެޓީމުން މެޗް ފަށާފައިވަނީ ބަދަލުކުޅުންތެރީންގެ ތެރޭގައި ހިމެނޭ 2 ކުޅުންތެރިއަކު ހިމަނައިގެންނެވެ. އޭގެތެރޭގައި އެޓީމްގެ ގޯލްކީޕަރާއި ޑިފެންސަށް ކުޅެންޖެހޭ ކުޅުންތެރިއަކުވެސް ހިމެނެއެވެ.
މިދެ ކުޅުންތެރީން ދަނޑަށް ހާޒިރުވެ މެޗްގައި ބައިވެރިވެވުނުއިރު މެޗްފަށައިގެންގޮސް އެފްސީ އަމީގޯ އިންވަނީ 3 ލަނޑު ޖަހާފައެވެ.
އެތުލެޓިކް އެފްސީގެ ދެކުޅުންތެރީން ދަނޑަށް ހާޒިރުވެ ޓީމާ ގުޅުނުކަމުގައިވިޔަސް އެޓީމުގެ ކުޅުން އެއްވެސް ވަރަކަށް ރަގަޅުވެން ދިޔަތަން ނުފެނި ، ފެނިގޮސްގެންގޮސްފައިވަނީ ފުލުފުލުގައި އެފްސީ އަމީގޯ އިން ލަނޑުތައް ޖަހަން ޖަހަމުންދިޔަތަނެވެ. މިގޮތުން ފުރަތަމަ ހާފްގެ ކުޅުން ނިމުނު އިރު އެޓީމުންވަނީ 7 ލަނޑު ކާމިޔާބުކޮށްފައެވެ. މިހާފް ގައި އެތުލެޓިކް އެފްސީއަށް ކާމިޔާބުކުރެވުނީ އެންމެ ލަނޑެކެވެ.
ދެވަނަ ހާފްގެ ކުޅުމުގައި އަމީގޯއިން އިތުރު 5 ލަނޑު ކާމިޔާބުކޮށްފައިވާއިރު އެތުލެޓިކް އެފްސީއަށް ކާމިޔާބުކުރެވުނީ 3 ލަނޑެވެ.
މިމެޗް ނިމިގެން ގޮސްފައިވަނީ 12 ލަނޑު 4 ލަނޑުން އަމީގޯ މޮޅުވެގެންނެވެ. މިމެޗްގައި އަމީގޯއިން ކާމިޔާބުކޮށްފައިވާ 12 ލަނޑުގެ ތެރެއިން ރައްޔުއާއި ގުސައްޔު 3 ލަނޑު ޖަހާ ހެޓްރިކް ހަދާފައިވާއިރު އެޓީމުން ދެން ކާމިޔާބުކޮށްފައިވާ ލަނޑު ތަކުގެ ތެރެއިން ލެވިޗް 1 ލަނޑު ، ހަސަން 2 ލަނޑު ، މުޖާ 1 ލަނޑު އަދި ޑިވް ވަނީ 2 ލަނޑު ކާމިޔާބުކޮށްދީފައެވެ.
އެތުލެޓިކް އެފްސީން ކާމިޔާބު ކޮށްފައިވާ 4 ލަނޑުގެ ތެރެއިން ދެ ލަނޑު ސަހާފް ކާމިޔާބުކޮށްދީފައިވާއިރު އެޓިމްގެ އަނެއް ދެ ލަނޑު ކާމިޔާބުކޮށްދީފައިވަނީ އަލިދީދީއާއި އައްސަދެވެ.
މިމެޗްގެ މޮޅުކުޅުންތެރިއަކަށް ހޮވާފައިވަނީ މިމެޗްގައި ހެޓްރިކް ހެދި ދެކުޅުންތެރިންގެ ތެރެއިން އަމީގޯގެ ގުސައްޔުއެވެ.
ފޮޓޯ: ލުބުނާ މަޖީދު މުޚްތާރު