ހެލްތް ޕްރޮޓެކްޝަން އޭޖެންސީ (އެޗްޕީއޭ) ގެ ލަފައާއި އެކު އަންނަ މަހު ސްކޫލުތަކާއި ކޮލެޖްތައް ހުޅުވައި ކިޔެވުން ފަށަން ނިންމާފައިވާ ކަމަށް ނޭޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) އިން ބުނެފި އެވެ.
ނޭޝަނަލް އިމަޖެންސީ އޮޕަރޭޝަން ސެންޓަރުން ރޭ ބޭއްވި ނޫސްވެރިންގެ ބައްދަލުވުމުގައި ހެލްތު މިނިސްޓްރީގެ އެސިސްޓެންޓް ޑިރެކްޓަރު އާމިނަތު ޝައިނާ ވިދާޅުވީ ކޯވިޑް-19 އާ ގުޅިގެން އަޅާފައިވާ ފިޔަވަޅުތަކަށް އިތުރު ލުއިތައް ދީ މަތީ ތައުލީމްދޭ މަރުކަޒުތައް ހުޅުވުމަށް ތައްޔާރީީތައް ވަމުން ދާކަމަށެވެ. ނަމަވެސް ކިޔަވައިދޭ މަރުކަޒުތައް ހުޅުވިގެންދާނެ ސީދާ ތާރީހެއް އެކަމަނާ ބުނެފައެއް ނުވެއެެވެ.
އަންނަ މަސް ތެރޭގައި ސްކޫލުތައް ހުޅުވާލާނެ ކަމަށް އެންއީއޯސީން ހާމަކުރި އިރު، އެޑިއުކޭޝަން މިނިސްޓްރީން ވަނީ ނިއު ނޯމަލްގައި ސްކޫލުތަކުގައި ކިޔަވައިދިނުމަށް ވާންޖެހޭ ތައްޔާރީތައް ވާން ފެށުމަށް ސްކޫލުތަކަށް އަންގައިފަ އެވެ.
އެޑިއުކޭޝަން މިނިސްޓަރު ޑރ. އައިޝަތު އަލީ ސޮއިކުރައްވައި ސްކޫލުތަކަށް ފޮނުވި ސާކިއުލާގައި ބުނެފައިވާ ގޮތުން ސްކޫލުތަކުގެ ދަންފަޅިތަކުގެ އަދަދާއި ހާޒިރުވާންޖެހޭ ގްރޭޑުތައް ކަނޑައަޅާނީ ސްކޫލުގެ އާބާދީ އާއި ރަށުގެ ބަލިމަޑުކަމުގެ ހާލަތަށް ބެލުމަށް ފަހުގައި ކަމަށެވެ.
އަދި ސްކޫލުގެ އިދާރީ ހިންގުމާއި ކިޔަވައިދިނުމުގެ އިންތިޒާމްތަކާއި ދަރިވަރުންނާއި މުވައްޒަފުންގެ ސިއްހީ ރައްކާތެރިކަން ކަށަވަރުކުރަން މި ހާލަތުގައި ގިނަ މަސައްކަތްތަކެއް ކުރަން ޖެހޭނެ ކަމަށާއި އެކަމަށް ބޭނުންވާ މައުލޫމާތާއި އިރުޝާދު ފަސޭހަކަމާ އެކު ފޯރުކޮށްދޭން ގިނަ މަސައްކަތްތަކެއް ކުރަމުން އަންނަ ކަމަށް ބުންޏެވެ.
މީގެ އިތުރުން ދަރިވަރުން ސްކޫލަށް ހާޒިރުވުމުގެ 15 މިނިޓްކުރިން މުދައްރިސުން ސްކޫލަށް ހާޒިރުވާން ޖެހޭނެ ކަމަށާއި، އަދި ދަރުވަރުން ސުކޫލަށް ވަނުމުގެ ކުރިން ހުން ބަލެމަށް އެ ސާކިއުލާގައި ވަނީ އަންގާފައެވެ.
ސްކޫލުތައް ބަންދުކުރެވިފައި ވީނަމަވެސް ސަރުކާރާއި އެޑިއުކޭޝަން މިނިސްޓްރީ ގުޅިގެން ގެންދަނީ ދަރިވަރުން ކިޔެވުން ހުއްޓުނަ ނުދިނުމަށްޓަކައި އެކި ވަގުތު ތަކަށް ބަހައިގެން ޓެލިކިލާސްތަކެއް ކުރިއަށް ގެންދަމުންނެވެ.